Corina Casanova dirigia da nov la Societad Retorumantscha, l'uniun purtadra dal Dicziunari Rumantsch Grischun. Per l’emprìma giada en si'istorgia, presidiescha ina dunna la Societad Retorumantscha. La giurista Corina Casanova è tranter auter stada chanzeliera federala dal 2008 fin il 2015. Ella succeda a Cristian Collenberg ch’è stà passa 20 onns en uffizi. Casanova è vegnida elegida a chaschun da la radunanza annuala da la SRR. Quella ha gì lieu ils 28 d'october a Cuira. Ella surprenda il post l'entschatta 2022.
Nov president d'onur
Cristian Collenberg è vegnì elegì sco president d’onur da la societad. El è s’engaschà 39 onnsa a favur da la societad. Cristian Collenberg è daventà suprastant da la SRR l’onn 1982 cun surprender la redacziun da las Annalas da la Societad Retorumantscha. Questa incarica ha el ademplì fin l’onn 1990, el è silsuenter restà en suprastanza. L’onn 1999 ha el alura surprendì il presidi da la societad ed ha dirigì quella durant passa 20 onns. En quests dus decennis passads ha la SRR stuì prender a maun la sfida da preparar ses project principal, l’ediziun dal Dicziunari Rumantsch Grischun entras l’Institut dal DRG, per il mund digitalisà.
Quint ed ulteriuras elecziuns
Il cassier, Roman Sgier, ha pudì presentar in quint da la societad equilibrà, cun in pitschen surpli d'entradas. Er il preventiv per il onn 2022 na prevesa betg in grond deficit. La radunanza annuala ha era elegì la suprastonza, quella sa cumpona da Chasper Pult, Roman Sgier, Dumenic Andry, Martín Camenisch, Gian Marco Beeli, Uorschla Natalia Caprez, Barbara Cuffaro e Bettina Berther. Las duas ultimas furman il nov tandem da redacziun da las Annalas.
