Cun la midada dal millenni hai dà en l’Europa in boom da snowboard. Pli che ventg onns pli tard n'è l’aissa betg pli uschè preschenta. En il Grischun variescha il dumber da snowboardistas e snowboardists pulit tut tenor en tgenin dals bunamain 50 territoris da skis ch'ins guarda.
Sin livel bass
Cun quai che las pendicularas na differenzieschan betg lur clients tranter snowboard u skis èsi grev da mussar si il svilup da las snowboardistas e snowboardists ils ultims onns. A Lai e Savognin saja la quantitad da la glieud che giaja cun l'aissa restada stabila ils ultims tschintg onns, plitost sin in livel bass, uschia ils responsabels. Ad Andermatt-Sedrun conferman las pendicularas che las cifras da snowboardistas e snowboardists sajan sa reducidas dapi ch'ils skis da freestyle sa derasian.
Spezialists profiteschan
A San Murezzan ed a Laax dattan las fatschentas da sport che n'èn betg exnum sa spezialisadas sin snowboards plitost a fit aissas. L'Element Store a Scuol venda e dat a fit be aissas. Curdin Heimgartner è in dals trais proprietaris da la fatschenta e promova il sport da snowboard a Scuol.
Ch'ins va cun passiun cun il snowboard, quai è impurtant per il sport.
Uffants èn l'avegnir
La scola da skis a Sedrun conferma che 5-10% da las scolaras e scolars sajan uffants ch'emprendian dad ir cun aissa, questa cifra saja constant bassa dapi l’onn 2010. A Laax percunter sajan quai 30%. Cun il «Snowpark» valan els sco hotspot da snowboard en l'Europa, da congualar cun il territori d’enviern Whistler en Canada. Er a Scuol vegnan promovidas snowboardistas e snowboardists, Curdin Heimgartner e ses team han sper la butia er la scola da snowboard «Element School». La scola da skis a Scuol porscha lecziuns da snowboard e da skis. Durant la stagiun auta, vul dir da Nadal e Bumaun sco er il favrer, han els fin 800 scolaras e scolars, da quests giaja mintga dieschavel cun l'aissa.
Il futur èn tar nus adina ils uffants.
Il boom da snowboard d'avant dapli che 20 onns è tschessà. L'aissa ha però tegnì ina plazza sin la naiv. Er sch'i dat en congual cun l'onn 2000 bler pli paucs snowboardists e snowboardistas. Sch'il snowboard è anc in trend dependa enorm dal territori da skis. En mintga cas è il snowboard s'etablà ed è daventà «normal» ubain part dal mintgadi sin pista.