Raschun per la malcuntentientscha entaifer la vischnanca da Poschiavo è sco la Südostschweiz scriva, ina plazza chantunala da selvicultur. Quella duai midar da Poschiavo a Zuoz.
En ina brev averta al chantun, fa la suprastanza da la vischnanca ussa la reproscha che quai saja ina centralisaziun. Mintga solia plazza en ina regiun periferica saja da muntada decisiva. Da las empermischuns da la regenza da vulari promover plazzas da lavur er en las regiuns na sentian ins nagut. Ils ultims svilups mussian però en in'autra direcziun, uschia la suprastanza da Poschiavo.
Chantun argumentescha cun reorganisaziun che gira gia daditg
Il chantun argumentescha sia decisiun tranter auter cun la reorganisaziun chantunala ch'è gia en gir dapi il 2002 e vegnia terminada cun questa midada. En il rom da questa reorganisaziun sajan ils anteriurs 30 uffizis forestals cirquitals vegnids unifitgads en ils tschintg centers regiunals sco els existan oz. Raschuns principalas per quest pass èn tenor Urban Maissen, il manader da l'Uffizi per guaud e privels da la natira pretensiuns pli autas che pretendan collavuraturs e collavuraturas spezialisadas. Perquai sco er per unifitgar las lavurs saja ina collavuraziun pli stretga en centers regiunals necessaria. Per la suprastanza da Poschiavo èn quests arguments però grevs da chapir.
