Per tut ils rimnaders e las rimnadras da bulieus è ils 11 dal mais adina puspè in di nua ch'il puls va in zic ad aut. Davent dals 11 èsi puspè lubì dad ir per bulieus en ils guauds grischuns.
Nua chattan ins actualmain bulieus?
Bulieus datti actualmain da chattar en tut las regiuns dal Grischun. Tut tenor vischnanca èsi dentant fitg different. Uschia per exempel en Surselva, raquinta la controlladra da bulieus, Lia Heini-Piacentini. En la regiun enturn Mustér u er en la Foppa guardi actualmain or spezialmein bain cun bulieus. Spezialmain mellens chattan ins blers.
Bain vesi er ora en ils guauds en l'Engiadin'Ota, di il selvicultur da revier da La Punt-Chamues-ch e Madulain, Ralf Fluor. Dapi il cumenzament d'avust èn ils bulieus creschids senza fin en ils guauds da la regiun.
Era en il Surses guardi ora bain, di Sep Antona Bergamin, guardiaselvaschina dal Surses manegia in zic salop: «Nua ch'igl è guaud chattan ins bulieus.» Ils lieus magics nua ch'ins chatta propi ils bels e gronds bulieus restan dentant er quest onn in misteri. Tgi che chatta dentant in hotspot, sto mo anc guardar da betg surpassar la limita da kilos per di.