Il 2022 sajan planisads damain plazzals ch'en la media dals davos tschintg onns. Il motiv principal saja, ch'ils projects vegnian adina pli cumplex e dovrian uschia dapli resursas. In dals projects ils pli gronds da quest onn è la renovaziun da la via dal Güglia tranter Grosskehrrank e Malix. Er projects gronds datti tranter Balamburtg e la Pùntcrap, sco er il schlargiament da la via dal Bernina tranter Pozolascio e Pisciadel.
Lavurs da sanaziun vi dals tunnels
Dasper ils projects da sanaziun, nua ch'i va il pli savens per midar la direcziun dal trassé u dal profil da la via, n'èn ils projects quest onn savens pli pauc invasivs, dentant tuttina fitg pretensius. Betg da sutvalitar sajan qua las lavurs da schubregiar ils tunnels. Durant far quai vegnian normalmain er gist fatgas las lavurs da sanaziun necessarias vi dals implants electrics. Durant quest temp ston ils tunnels vegnir serrads. Perquai vegnan questas lavurs normalmain fatgas durant la notg.
Cumportament tar ils plazzals
La segirezza dals lavurers e las lavureras sin ils plazzals haja emprima prioritad, scriva la regenza. Puncts centrals sajan che las prescripziuns da segirezza vegnian resguardadas e ch'ils manischunzs che passan tras plazzals fan attenziun. Perquai supplitgeschan il chantun sco er las firmas da construcziun, da passar ils plazzals cun in tempo adattà e cun avunda distanza tar las barricadas. Plinavant duain ins er esser pli attent cun passar ils plazzals, per pudair reagir pli svelt sin situaziuns nunspetgadas.
