Ils avantatgs da questa cunvegna sajan tenor la presidenta da la cumissiun per economia dal Cussegl grond Carmelia Maissen, che la surdada da lavurs vegnia uschia armonisada e simplifitgada en tut ils chantuns. Ed aspects sco qualitad, innovaziun ubain criteris socials èn uschia pli impurtants facturs per decider tge interpresa che survegn ina lavur dal chantun, che be il pretsch.
Ina revisiun da la cunvegna è stada necessaria, perquai ch'er la Confederaziun respectiv l'Organisaziun mundiala da commerzi WTO han revedì lur reglas. Perquai è lura era la debatta en il Cussegl grond stada plitost curta – be singulas vuschs han crititgà ch'ins dettia uschia las hottas or da maun, respectiv surpiglia reglas ch'ins na possia betg adattar als agens desideris. Dentant malgrà la critica èn las deputadas ed ils deputads stads unanimamain da l'opiniun ch'i saja da sa participar a la cunvegna.
