Pervi da la naiv sin las vias grischunas ha la polizia survegnì mardi dapli che 20 annunzias da collisiuns d'autos – donns pli gronds da persunas n'haja betg dà, scriva la Polizia chantunala en ina communicaziun. Pervi da las cundiziuns d'enviern sin via hai dà impediments dal traffic, surtut sin la via N13 a Schons e Valragn, curt avant las trais. La raschun sajan stads autos cun pneus da stad ch'eran a mesa via. Per rumir la naiv han ins serrà suenter las quatter il tschancun tranter Tusaun e San Bernardino quai per radund duas uras. Sin l'autostrada tranter Andeer ed il tunnel dal San Bernardino hai dà colonnas e sur blers pass valeva mardi in obligatori da chadainas.
Infurmaziuns dal chantun
Plinavant hai dà impediments sin la lingia da tren tranter Reichenau e Cuira. La raschun era in disturbi da la barriera. I ha dà retards e trens che n'èn betg pli cursads.
Qua vai tar la situaziun actuala da las vias e dal traffic.
Fin gievgia èsi anc da quintar cun ina u l'autra scrotta da naiv. Suenter ina pausa il mardi, datti probablamain mesemna e gievgia anc ina giada in zic naiv fin sin 1'000 ubain 800 meters sur mar. Quai èsi lura però tenor las prognosas actualas er gia stà cun naiv per il mument.
En diversas regiuns dal Grischun sco p. ex. Bravuogn, Cuira, Savognin u era Tavau e Susch hai dà il prim da november dal reminent gia dapli plievgia u naiv che durant l'entir mais d'october.
