Privel da lavinas
La situaziun da lavinas è tendida en parts da la Svizra. Per l’entir chantun Grischun vala in privel da lavinas considerabel, stgalim 3.
En parts dals chantuns Vallais, Vad, Berna, Sursilvania, Uri, Glaruna e Son Gagl vala schizunt in privel da lavinas grond, stgalim 4 da 5. Quai annunzia l’Institut da naiv e lavinas a Tavau. Per part haja dà fin 40 centimeters naiv nova fin venderdi suentermezdi. Tenor l’institut duess il privel da lavinas spontanas sa reducir en il vest ed il nord. Dasper las pistas marcadas restia la situaziun da lavinas dentant per gronda part critica.
Bulletin da lavinas
Precauziun sin las vias
- Ils pass dal Flüela è serrà per motivs da segirtad.
- Il pass dal Lucmagn è serrà da las 6 enfin damaun marvegl da las 8.
- Sin las bleras vias en il Grischun èsi da quintar cun naiv.
Situaziun da traffic
E co vinavant cun l'aura?
Oz sonda èsi ferm surtratg ed i naiva adina puspè. En l'Engiadina èsi da quintar be cun pauca naiv. En las valladas dal sid datti scleridas. En la muntogna buffa in ferm vent. La temperatura maximala è tranter minus 4 grads en l’Engiadin’Ota e plus 2 grads en la regiun da Cuira.
Damaun avantmezdi hai anc rests da nivels. Uschiglio èsi detg sulegliv. En il decurs dal suentermezdi sa furman puspè nivels pli spess. Quai cunzunt en il Grischun dal Nord. I resta dentant per gronda part sitg. A Cuira datti damaun enturn 5 grads.