Il chantun Grischun survegn 16,2 milliuns francs or da la reserva dal cussegl federal. Quel aveva mess da la vart 1 milliarda per sustegnair branschas ed interpresas ferm pertutgadas da la pandemia da corona. Quai ha il minister d’economia Marcus Caduff ditg en il Cussegl grond. I dettia dentant cundiziuns per il diever da quels daners – tranter auter sto l’interess chantunal esser da gronda muntada. Perquai haja il chantun decidì da duvrar ils daners per fatschentas grondas en il turissem che fan ina svieuta d’almain 5 milliuns francs. Cun sustegnair quellas, sustegnian ins er auters, per exempel acturs en il commerzi.
Booster en Grischun
Gia passa la mesadad da las persunas sur 65 en Grischun han gia survegnì il booster, ha ditg il Cusseglier guvernativ Peter Peyer a chaschun da la runda da dumondas en il Cussegl grond. Fin il mardi hajan ins fatg passa 25'680 vaccinaziuns da booster. Fin la fin da l’onn pudessan teoreticamain 70'000 persunas en il Grischun survegnir in booster. Quai dentant be sche quellas persunas veglian era. Tar talas persunas scada il temp da carenza enfin lura (sis mais dapi la segunda vaccinaziun). Da quellas 70'000 èn 37'000 sur 65 onns. Il center da Walk-In a Cuira per laschar dar il booster resta avert enfin la fin da l’onn. Silsuenter na stattan quellas localitads betg pli a disposiziun.
En pli ha il Grischun fatg durant l’emna passada 626 emprimas vaccinaziuns, tge ch’è dapli che las emnas avant. Il potenzial da la primavaira e l'entschatta stad n'hajan ins dentant anc betg cuntanschì.
Scolas sentan corona
Er ils uffants e giuvenils fin 19 onns sentan la 5avla unda da corona, ha ditg il Cusseglier guvernativ Jon Domenic Parolini. Radund 33% dad els sajan gia vegnids en contact cun il coronavirus. Fin la fin da november eran ina scola e 15 classas en quarantina, uschia Parolini. En il mument dettia bleras malsegirezzas per las scolas, la magistraglia e natiralmain er per ils uffants e lur geniturs.
En general possian ins dir che las scolas fetschian ina fitg buna lavur e quai malgrà tuttas sfidas ed ils svilups. Las bleras scolas chapeschian l’agir dal chantun, uschia per exempel per l’obligatori da mascrina. Dentant dettia er adina puspè discussiuns. Per exempel: geniturs che na veglian betg che lur uffant portia mascrina u scolasts che n’èn betg cuntent cun las mesiras.
Da 2G, triascha e pretensiuns dispitaivlas
La debatta da corona è alura stada fitg animada. Temas hai dà avunda, la situaziun actuala, 2G, ina triascha pussaivla, la vaccinaziun ed il booster. Betg paucs deputads èn stads da l'avis ch'i dovria dapli mesiras per evitar in shutdown. Franz Sepp Caluori, il deputà da l'Allianza dal Center e president da Gastro Grischun, ha pretendì che la regenza s'engaschia per ulteriuras mesiras – schizunt er 2G. Sustegn ha el tranter auter survegnì dals Socialdemocrats.
I fa surstar che questas pretensiuns vegnan da la gastronomia
Dad in'auter avis èn deputadas e deputads da la PLD e la PPS stads. 2G na schlia betg il problem, anzi, la situaziun da persunal en la gastronomia ed era en la tgira possia schizunt sa pegiurar, sch'ins sto trametter a chasa collavuraturas e collavuraturs.
Ina resposta sin la pretensiun da 2G n'hai betg dà da la regenza – mesiras dal chantun na sajan betg prevesidas, uschia il cusseglier guvernativ Marcus Caduff.