Per remplazzar in stgaudament dad ieli, gas u d’electricitad ha il chantun dublegià sias contribuziuns. E per isolar fatschadas e tetgs datti 50% dapli daners. Betg mo gliez procuria per quest boom da dumondas da sustegniment, di Thomas Schmid, manader da l’uffizi d’energia e traffic. Era ils auts pretschs dad ieli e gas fetschian quitads a la populaziun e promovian da stgaudar cun energia regenerabla.
Gronda part da reducziun d'emissiuns cun sanaziuns
Quest onn ha il chantun gia lubì sustegns finanzials da var 7 milliuns francs per remplazzar stgaudaments ed isolar bajetgs. Avant in onn eran quai anc stà be 2 milliuns francs. Per ils proxims quatter onns ha il chantun mess da la vart 67 milliuns francs per reducir emissiuns nuschaivlas per il clima. La gronda part da questa summa è reservada per sustegnair proprietaris che vulan isolar lur chasa e remplazzar stgaudaments.
