Oz dumbra Cuira stgars 40'000 abitantas ed abitants. Avant 160 onns abitavan en la chapitala grischuna gnanc 7000 persunas. Cler che questa creschientscha ha chaschunà enormas midadas. Saja quai che bler terren è oz surfabritgà, saja quai midadas en l’architectura da la citad.
Avant curt ha l’anteriur schurnalist e fotograf Charly Bieler publitgà in cudesch che mussa e documentescha quel svilup. Quai cun fotografias veglias ed actualas. Uschia ch'ins vesa bain la transfurmaziun da tschertas plazzas, abitadis e da l’entira citad da Cuira.
In mix architectonic
Sin basa da questas cumparegliaziuns è spert cler che Cuira sa preschenta ozendi sco in mix architectonic. Auter ch'en la citad veglia na vesians nagliur pli structuras cleras d'ina citad, din era experts.
Oz è Cuira sco ovs sbattids.
Bleras giadas stattan singulas chasas u surbajegiadas en il focus da la planisaziun, e betg pli l’entir purtet da la citad. Quai n'è però betg uschia mo a Cuira – in fenomen da fitg bleras citads en l'entira Svizra.
Midà vista e pers substanza veglia
Sur tut ils onns n'è Cuira betg mo creschida, ma ha era midà fatscha. Uschia è la plazza «Arcas» per exempel relativ giuvna. Quella datti pir dapi ils onns 1970 ch'ins aveva rut giu pliras chasas. In auter exempel è la plazza da la staziun. Oz cun chasaments fitg urbans. Oriundamain era là l’anteriur hotel «Steinbock». In stabilimaint grond ch'è vegnì rut giu l’onn 1962. Quai era vegnì crititgà fitg ferm da lezzas uras – che questa substanza è ida a perder.
I na va betg per la substanza, ma per l'identitad.
Quai vesa l’experta Christine Seidler in zic auter. I na giaia betg per la substanza veglia che giaja a perder, mabain en emprima lingia per l'identitad che la populaziun collia cun in bajetg. Sche questa giaja a perder, lura saja quai bler mender, che sche in bajetg svaneschia.
Sfidas per l’avegnir
Tenor Seidler han las planisadras ed ils planisaders da citads grondas sfidas per l'avegnir. Ina da questas saja ch’els ston integrar dapli la populaziun en il process da planisaziun. I saja impurtant d’integrar differents mainis en in process da planisaziun. Be uschia saja ina planisaziun da citad era persistenta. A la fin giaia quai per il svilup da la pli veglia citad da la Svizra.