Purtà viaden la proposta en la cumissiun ha la socialdemocrata grischuna Sandra Locher Benguerel. Cun 16 cunter 8 vuschs è sia proposta vegnida approvada cun gronda maioritad. Sch'era las duas chombras parlamentaras suondan la cumissiun, stessan a disposiziun 300'000 francs dapli mintg'onn durant la perioda 2021 enfin 2024. Il Parlament federal tracta il messadi da cultura en la sessiun d'atun che cumenza il settember.
Quels daners duessan tenor il giavisch da Sandra Locher Benguerel e da la Lia Rumantscha vegnir duvrads per projects per promover il rumantsch en la Bassa, pia ordaifer il territori da tschep.
Lia ed FMR profiteschan
Il settember passà, a chaschun da la preschentaziun dal messadi da cultura tras il Cussegl federal, aveva la Lia Rumantscha crititgà la repartiziun dals daners.
Previs è là bain in augment da la contribuziun annuala al Grischun da 400'000 francs sin total enfin 5,3 milliuns francs. 300'000 francs duain dentant ir a la FMR, la Fundaziun medias rumantschas.
Ord l'archiv:
Qua pudais tadlar suenter tut las contribuziuns davart la repartiziun dals daners.