La Confederaziun ha l'onn passà dà or dapli daners che quai ch'il frain a l'indebitament («Schuldenbremse») avess lubì en la situaziun economica actuala. Quai per la segunda giada en roda – uschia il Cussegl federal a chaschun d'ina conferenza da pressa. Il deficit structural munta a 350 milliuns francs. Ils debits nets èn creschids, tenor cifras provisoricas da l'Administraziun federala da finanzas, per 1.4 milliardas francs a nov 142 milliardas francs. Per evitar che questa situaziun cuntinueschia, ha il Cussegl federal decis ulteriuras mesiras da spargn.
Las novas mesiras da spargn da 350 milliuns francs tutgan tranter auter suandants secturs:
- la collavuraziun internaziunala
- la cultura
- l'agricultura
- il traffic da persunas regiunal
- l'ambient
- la promoziun economica
- agens secturs e l'administraziun
Betg pertutgada è l'armada ch'è actualmain en las stretgas finanzialas.
2 milliardas eran gia decididas
Il Cussegl federal aveva decis gia il schaner differentas mesiras da spargn da 2 milliardas francs. Planisà è da pajar pli pauc al fondo da l'infrastructura da viafier, da scursanir las contribuziuns a las scolas politecnicas federalas e da desister da la contribuziun federala a l'assicuranza cunter la dischoccupaziun.
Las pli novas mesiras da spargn pertutgan l'uschenumnà agen sectur ed il sectur da transfer. Las expensas da transfer cumpiglian tut las contribuziuns che la Confederaziun paja a terzs, sco per exempel als chantuns, a vischnancas, ad instituziuns ed a segiradas socialas.
Cun tut questas mesiras saja il preventiv 2025 confurm al frain a l'indebitament, uschia il Cussegl federal. Quai però be sut la cundiziun ch'i na vegnia betg decis ulteriuras expensas supplementaras.
Senza mesiras da spargn na vai era betg en il futur
Malgà ch'il Cussegl federal vul cuntinuar cun ina part da questas mesiras da spargn, quinta el per ils onns 2026 fin 2028 cun ulteriurs deficits da milliardas. La raschun è che las expensas per l'AVS (l'Assicuranza per vegls e survivents) creschan, sco era quellas per las reducziuns da las premias, per l'armada e per la tgira d'uffants.
In grond problem è che las expensas per l'AVS e l'armada creschan marcantamain pli spert che las entradas. Ils deficits vegnian perquai a media vista d'onn tar onn pli gronds. Ultra da quai duain las expensas per fugitivs or da l'Ucraina en il futur betg pli ir sur il preventiv extraordinari. Il pli tard l'onn 2028 duain tut las expensas en il sectur da la migraziun ir sur il preventiv ordinari.
Sco quai ch'il Cussegl federal scriva, dovria mesiras profundas. Fin la fin da mars duai esser sin maisa in concept che examinescha a moda fundamentala las incumbensas e las subvenziuns da la Confederaziun.