Siglir tar il cuntegn

Header

video
Il Cussegl federal ha decidì oz co i va vinavant
Or da Telesguard dals 29.04.2020.
laschar ir. Durada: 3 minutas 14 Secundas.
cuntegn

1. decisiun: ustarias & events Davent dals 11 da matg dastgan ustarias e stizuns puspè avrir

Grafica schluccament.
Legenda: RTR grafica
  • Pli baud che pensà pon uschia er ustarias avrir. En in'emprima etappa èsi pussaivel che gruppas enfin quatter persunas pon ir a l'ustaria. Excepziuns dettia per geniturs ed uffants cun dapli persunas.

  • Cunquai che il risico d'infecziuns resta gronds èn occurenzas cun dapli che 1'000 persunas scumandadas enfin la fin d'avust. Quai munta che la stad resta senza festivals ed openairs. Quai pertutga era il pli grond festival grischun il Openair Lumenzia.
  • Il Cussegl federal ha era decidì co vinavant cun la matura. Gimnasis pon desister d'examens a scrit da matura. La decisiun ston ils chantuns dentant prender.
  • I dat sustegn finanzial per la Swiss e la Edelweiss. La Confederaziun garantescha credits da maximalmain 1.275 milliardas francs.

L'entira conferenza en tun e maletg (sura) u ina survista da las explicaziuns ch'il Cussegl federal ha fatg avant las medias en Chasa federala a Berna.

Il ticker è a fin

  • 16:11

    Adia

    Quai èsi stà da l'emprima conferenza da medias dal Cussegl federal. El ha decis ils proxims pass da returnar dal lockdown en la normalitad. En ina segunda conferenza da medias preschenta il Cussegl federal decisiun davart il cunfins, il sport ed er las votaziuns federalas.

  • 15:42

    Mascras en il traffic public e scolas

    Per regla giaja quai da tegnair distanza en il tren u tram. Sche ina distanza da dus meters na saja dentant betg pussaivla, lura sajan mascras d'igiena recumandadas ha ditg Simonetta Sommaruga.

    Sch'i dovria mascras en las chasas da scola dapendia fermamain da l'infrastructura da scola. La decisiun en chaussa saja perquai tar las autoritads da scola.

    video
    Sommaruga davart las mascras da schurmetg
    Or da News-Clip dals 29.04.2020.
    laschar ir. Durada: 29 Secundas.
  • 15:39

    Persunas da risico

    Ina schurnalista vul savair sche persunas sur 65 onns e persunas en la gruppa da risico dastgan ir a l'ustaria a partir dals 11 da matg. Tenor Berset dastgian er quellas persunas ir en ina butia u restaurant. I valia dentant anc adina precauziun, cunzunt per persunas cun malsognas preexistentas.

  • 15:29

    Runda da dumondas

    Da fertant pon schurnalistas e schurnalists tschentar dumondas. A partir da las 16:15 datti ina segunda conferenzas da medias. Pled e fatg dattan lura la cussegliera federala Karin Keller-Sutter e cussegliera federala Viola Amherd.

  • 15:13

    Chantuns decidan davart examens da matura

    Il Cussegl federal ha decidì che gimnanis pon desister d'examens a scrit da matura. Decider en chaussa pon dentant ils chantuns. Er sch'ins po desister d'examens a scrit, decida er mintgamai il chantun. Uschia ha explitgà il minister d'economia Guy Parmelin.

    Examens da maturitad professiunala na datti betg, en quests cas quintan las notas empiricas.

  • 15:09

    Dumondas anc betg scleridas

    Co quai va vinavant cun gimnasis, scolas autas, festas en baselgia ed er las pendicularas saja uss anc betg cler. Tenor Alain Berset stoppia il Cussegl federal anc discutar davart quellas reaverturas.

  • 15:05

    Occurenzas grondas

    Occurenzas cun dapli che 1'000 persunas èn scumandadas enfin la fin d'avust. Uschia datti er nagin Openair Lumnezia, sco previs la fin fanadur. In privel d'infecziuns tar occurrenzas grondas saja memia grond, ha explitgà Alain Berset.

  • 15:03

    Scolas

    Instrucziun da la scola obligatorica è pussaivla a partir dals 11 da matg. Er en gimnasis e scolas terziaras èsi pussaivel da far instrucziun, quai dentant cun ina limitaziun da tschintg persunas en classa. Da decider davart il manaschi da scola è chaussa da mintga chantun. Il chantun Grischun ha annunzià ina conferenzas da medias la gievgia en chaussa. Là vulan il minister d'educaziun Jon Domenic Parolini ed ils experts dals uffizis dar scleriment davart ils detagls da scola.

    audio
    Las pli impurtantas informaziuns davart las scolas
    ord Actualitad dals 29.04.2020. Maletg: RTR
    laschar ir. Durada: 5 minutas 47 Secundas.
  • 15:01

    Ustarias pon avrir a partir dals 11 da matg

    Pli baud che pensà pon er ustarias avrir. En in'emprima etappa a partir dals 11 da matg èsi pussaivel che gruppas enfin quatter persunas pon ir a l'ustaria. Excepziuns dettia per geniturs ed uffants cun dapli persunas. Per las ustarias valan dentant las reglas d'igiena sco er in obligatori da tegnair 2 meters distanza tranter las gruppas.

    video
    Berset: «20'000 ustarias èn pertutgadas.»
    Or da News-Clip dals 29.04.2020.
    laschar ir. Durada: 44 Secundas.
  • 14:58

    Schluccadas pli svelt che pensà

    Ils cas d'infecziun sa sviluppeschan da moda positiva, uschia Alain Berset, minister da sanadad. Dapi 10 dis haja quai dà main che 250 novs cas da corona per di. Quai pussibiliteschia d'avrir pli svelt ed er dapli che pensà.

  • 14:50

    Schluccadas dals 11 da matg

    Avrir pon / pussaivel è:

    • scolas obligatoricas (scola primara e stgalim aut)
    • gimnasis e scolas medias cun instrucziun d'enfin tschintg persunas
    • far examens en scolas
    • stizuns e fieras
    • biros da viadi
    • museums, bibliotecas ed archivs
    • sport popular senza contact da corp
    • sport d'elita en ligas professiunalas (senza concurrenzas)
    • restaurants per gruppas da fin 4 persunas ubain famiglias
    • implants da sport (per trenaments)
    • traffic public cun l'urari usità
  • 14:47

    Pled e fatg dattan:

    • Simonetta Sommaruga, presidenta da la Confederaziun
    • Alain Berset, minister da sanadad
    • Guy Parmelin, minister d'economia
  • 14:32

    Dapi quest'emna èn avertas las emprimas fatschentas

  • 14:29

    Bainvegni

    Il Cussegl federal infurmescha en duas conferenzas da medias, l'emprima cumenza a las 14:45, la segunda a las 16:15. RTR rapporta d'in cuntin da las precisiuns ch'il Cussegl federal preschenta en connex cun las schluccadas dal lockdown.

RTR novitads 15:00

Artitgels legids il pli savens