Malgrà che la pandemia ha procurà per damain traffic l'onn 2020 e che l'enviern miaivel ha reducì il basegn d'ieli e gas per stgaudar n'èsi betg gartegià d'ademplir la finamira. Dapi il 1990 èn las emissiuns da stgaudar sa reducidas per 39% – la finamira muntava a 40%. Il rapport da l'Uffizi federal d'ambient mussa vinavant ch'i vegn era anc oz duvrà dabler energia fossila per stgaudar. Perquai haja l'aura e cunzunt las temperaturas durant l'enviern in grond effect sin la quantitad da gas cun effect da serra che vegn emess en l'atmosfera.
Er tar il traffic na sa mussia betg ina meglier maletg. Autos e camiuns sajan oz bain pli effizients che avant trais decennis. Però dettia dapi lura dapli traffic ed uschia – sut il stritg – er dapli emissiuns cun effect da serra. En il sectur da traffic è reussì in minus da 8%, enstagl da 10%.
Rinforzar mesiras en tut ils secturs
Sulettamain il sectur d'industria ha dumagnà da reducir las emissiuns tenor la finamira, vul dir per 15%. Per reducir las emissiuns a moda considerabla stoppian las mesiras per la protecziun dal clima vegnir rinforzadas en tut ils secturs, scriva l'Uffizi federal per l'ambient.