Il concern da tecnica sanitara Geberit crescha vinavant a moda rasanta. L’emprim quartal da l’onn saja la svieuta s’augmentada per 7,8% sin 980 milliuns francs, cumpareglià cun la medema perioda da l’onn passà. Quai ha communitgà il concern cun sedia a Rapperswil-Jona.
La raschun per questa creschientscha saja l'augment dal pretsch da vendita ed era ils positivs effects dal volumen. La dumonda en la branscha da construcziun saja vinavant stada gronda.
Gudogn da 220 milliuns
Sut il stritg ha Geberit fatg in gudogn da 220 milliuns francs – in minus da 3,7%. Quai cunzunt pervi da l’augment dals custs per materias primas, l’energia ed il transport. Tuttina ha il resultat surpassà las spetgas dals analists ed analistas sin tut ils nivels. Prognosas per l’entir onn da gestiun na fa Geberit sco usità anc betg la primavaira.
