Siglir tar il cuntegn

Header

Grafik Wahlbarometer 3 da März: Wahlabsichten
Legenda: RTR
cuntegn

1. retschertga da votaziun Gea a l'iniziativa per 13avla renta – Na a l'iniziativa da rentas

Set emnas avant la votaziun fiss l'iniziativa per ina 13avla renta da l'AVS vegnida acceptada. L'autra iniziativa – l'iniziativa da rentas che vul augmentar la vegliadetgna da pensiun – però refusada. Quai mussa l'emprima retschertga da l'institut Gfs Berna fatga sin incumbensa da la SRG SSR.

Ils 3 da mars votescha il suveran svizzer davart duas iniziativas en connex cun las rentas:

  • L'iniziativa da rentas vul che la vegliadetgna da renta per umens e dunnas vegn augmentada pass per pass sin 66 onns enfin il 2033 e suenter adattada a l'aspectativa da vita.
  • L'iniziativa per ina 13avla renta da l'AVS pretenda ina 13avla renta per segirar meglier il minimum d'existenza suenter la pensiun.

Radund set emnas avant il termin da votaziun fiss l'iniziativa per ina 13avla renta vegnida acceptada, l'iniziativa da rentas che vul augmentar pass per pass la vegliadetgna da pensiun però refusada. Tenor l'institut Gfs Berna fiss la partizipaziun stada sur la media cun 48%. I sa tracta d'ina impressiun dal mument avant che la fasa da campagna ha cumenzà e betg d'ina prognosa. Il cumbat da votaziun e la furmaziun d'opiniun cumenzian pir, scriva l'institut da perscrutaziun.

audio
Gfs: Votaziun 13avla renta: suveran schess gea
ord Actualitad dals 26.01.2024. Maletg: RTR
laschar ir. Durada: 4 minutas 28 Secundas.

61% Gea a l'iniziativa per ina 13avla renta d'AVS

61% da las persunas dumandadas avessan ditg Gea u plitost Gea a l'iniziativa per ina 13avla renta. 36% però voteschan segir u plitost cunter. La furmaziun d'opiniun saja avanzada mesaun, scriva l'institut. Pli veglias che las persunas èn e pli fitg ch'ellas sustegnan l'iniziativa, ma er en la gruppa dals pli giuvens e las pli giuvnas votantas e votants datti ina maioritad che sustegn la 13avla renta. En il spectrum da partidas survegn l'iniziativa cunzunt sustegn da sanester e da persunas senza partida sco er da persunas che na fidan betg a la regenza. Er sustegn, ma pli pauc cler, datti da simpatisantas e simpatisants da la PPS e da l'Allianza dal Center. Uschia èsi da constattar che l'opiniun da la basa e la testa da la partida sa divergeschan. Vul dir il timun da la partida è mintgamai cunter, la basa plitost persuenter.

Critica per l'iniziativa creschia bain tar persunas cun dapli entradas ed ina megliera furmaziun da scola ma er là na domnieschia quella betg. Gfs constatescha pli pauc sustegn en la Svizra tudestga ch'en las autras parts linguisticas. Plinavant è il sustegn pli grond en lieus urbans che en l'aglomeraziun e la champagna.

Iniziativa perda probabel sustegn

Malgrà il sustegn actual quinta Gfs Berna sco usitadamain tar iniziativas che quella perda sustegn. Per regla survegnian ils arguments cunter ina iniziativa en il decurs d'ina campagna dapli plaz e las opiniuns s'accordeschian a las recumandaziuns da Cussegl federal e parlament – lezs refusan l'iniziativa. Sch'il trend sco usitadamain tar iniziativas sa mussa veramain er tar questa, vegnia l'iniziativa che vul ina 13avla renta d'AVS a far naufragi.

53% èn cunter l'iniziativa da rentas

Sch'i fiss gia vegnì votà mez schaner davart l'iniziativa da rentas avess quella fatg naufragi cun 53%. 41% da las persunas dumandadas èn per l'iniziativa. 6% da las persunas dumandadas èn anc indecisas. La gronda part da las gruppas che l'institut ha intercurrì è cunter l'iniziativa. Sulettamain persunas ch'èn gia en la vegliadetgna da pensiun èn per gronda part per l'iniziativa che vul auzar pass per pass la vegliadetgna da renta. Sper las persunas pensiunadas sustegnan er simpatisantas e simpatisants da la Partida liberaldemocratica ella. Quai correspunda er a la parola Gea che la PLD ha decis. Er tar la Partida verdliberala è la cumpart Gea il mument pli gronda, quai malgrà che la partida ha prendì la parola Na. En tut las autras partidas è la cumpart che vul laschar ir da la glatscha giu l'iniziativa da rentas pli gronda. Cunzunt aderentas dals socialdemocrats, verds e persunas senza partida èn cunter auzar la vegliadetgna da pensiun sco l'iniziativa prevesa.

Gfs Berna resumescha che la situaziun da partenza discurria per in naufragi da l'iniziativa da rentas cunquai che l'intenziun da votar saja gia uss critica. E quai creschia tipicamain anc en il decurs da la campagna.

Auta participaziun a l'urna

En questa emprima retschertga da votaziun ha Gfs Berna mesirà in'auta participaziun da stgars 48%. Quai è sur la media dals ultims onns. Tenor l'Uffizi fedeal da statistica è la participaziun a votaziuns tranter 2011 e 2022 tar 47,1%. En il decurs da la campagna vegn quintà che la valur s'augmentia uschia che Gfs fa quint cun in'auta participaziun a l'urna ils 3 da mars.

La retschertga

Avrir la box Serrar la box

L'institut da perscrutaziun Gfs Berna ha fatg la retschertga en vista a las votaziuns dals 3 da mars per incumbensa da la SRG SSR. L'institut ha dumandà 19'490 votantas e votants tranter ils 8 e 21 da schaner 2024. La quota da sbagl munta a +/- 2,8 puncts procentuals.

RTR novitads 06:00

Artitgels legids il pli savens