Suenter ils minus massiv dals onns precedents, è il consum da tschigulatta en Svizra puspè sa stabilisà, ha communitgà l'uniun da l'industria da tschigulatta svizra, Chocosuisse. Creschì saja vinavant la massa da producziun sco era la svieuta cun tschigulatta en Svizra ed en l'exteriur.
Ferm export
Concret saja s'augmentada la producziun da tschigulatta svizra, grazia a l'export che saja s'augmentà per 3,8% sin radund 200'000 tonnas. La svieuta è creschida per 2,2% sin stgars 1,9 milliardas francs. La part da l'export da tschigulatta svizra, saja cun 73,7% prest trais quarts da l'entira producziun. Il 2018 saja questa valur anc stada tar 72,5%.
La svieuta cun tschigulatta en l'exteriur haja per l'emprima giada surpassà il cunfin dad ina milliarda francs. Creschida saja la fatschenta cun exports sur tut en stadis che na tutgan betg tar l'Uniun europeica. Il pli grond creschament haja dà qua en il Canada, ils Stadis Unids, la China, il Proxim Orient e Singapur. L'UE saja dentant anc adina il martgà il pli impurtant.
