En ina communicaziun da la cuminanza d'interess scrivan las 10 citads ch'ils carstgauns sajan adina puspè s'inscuntrads tar in'exposiziun per sa fatschentar cun il preschent ed il futur da la Svizra. Quai dapi l'emprima exposiziun naziunala il 1883.
La Svizra sa midia svelt ed er la generaziun dad oz fadigia sia atgna Expo. Suenter il na per l'Expo 2017 en la regiun dal Lai da Constanza e la Svizra da l'ost, lantscheschan els l'idea da cumpigliar tuttas parts dal pajais e tuttas regiuns linguisticas en la proxima Expo naziunala. Las citads pudessan nizzegiar lur experientschas cun occurenzas grondas ed era porscher l'infrastrucziura per ina tala occurenza da las generaziuns.
Las regiuns stoppian vegnir involvadas
Citads sajan origins, centers e motors per il svilup da la societad. Co viver ensemmen en in midament cuntinuond sappia funcziunar, fatschentia las citads gia adina.
Davart questa dumonda vulan las citads grondas perquai sa barattar cun l'entira Svizra. Las 10 citads lantscheschan l'idea perquai en bun savair che las singulas citads stoppian ponderar ina realisaziun d'ina Expo en l'entira Svizra ensemmen cun las regiuns.
En 10 enfin 15 onns
Las citads involvadas han resumà lur idea en in memorandum. Uschia pudess ina proxima Expo avair lieu gia en 10 enfin 15 onns. Ina skizza dal proceder duai en in proxim pass definir ils puncts centrals. Tier quests puncts tutgan sur tut ils purtaders, process da decisiun, cundiziuns da basa finanzialas ed il temp cu l'exposiziun duai avair lieu. Davart quests scleriments vulan las citads infurmar la primavaira.
Las diesch citads èn Turitg, Basilea, Berna, Biel, Genevra, Losanna, Lugano, Luzerna, Son Gagl e Winterthur.
RR novitads 11:00