91 projects ha la Chadaina da Fortuna pudì finanziar en il Haiti cun ils 63 milliuns francs che la populaziun svizra ha dà suenter il grond terratrembel il schaner 2010. Daners ch'èn tranter auter vegnids duvrads per projects da reparar e bajegiar novas chasas, funtaunas u tualettas.
Cuntent cun las chasadas bajegiadas
Quai che fetschia surstar zunt fitg saja, uschia ils auturs da l'analisa, che prest tut ils dumandads vivian anc oz en las chasas bajegiadas avant bainbaud diesch onns. La glieud sa sentia para fitg segira e protegida da catastrofas da natira en las chasas finanziadas da la Chadaina da fortuna. Quel sentiment saja anc vegnì rinforzà suenter il stemprà Matthew il 2016, cura che las chasas hajan, auter che usità, tegnì pitg a las forzas da la natira.
Insumma mussa l'analisa d'agid en il Haiti che la gronda part dals dumandads, numnadamain passa 90%, è da l'avis ch'ils projects sustegnids da la Chadaina da Fortuna hajan manà a la pli impurtanta midada da lur vita.
RTR novitads 11:30