Siglir tar il cuntegn

Header

cuntegn

Svizra 100 onns per ils interess da la diaspora

Oz vivan radund 760'000 Svizras e Svizzers, pia bun 10% da l'entira populaziun, en l'exteriur. L'OSE, l’Organisaziun da las Svizras e dals Svizzers en l'exteriur ha la finamira da represchentar lur interess en Svizra. Interess ch’èn sa midads durant ils 100 onns ch’i dat l’organisaziun.

audio
Mezdi: 100 onns organisaziun svizzers en l'exteriur
ord Actualitad dals 05.08.2016.
laschar ir. Durada: 2 minutas 52 Secundas.

Pli baud saja stada l'incumbensa da l'OES en emprima lingia quella da mantegnair il contact cun la diaspora e d'infurmar lezza davart la posiziun da la Svizra sco stadi neutral. Oz sa chapeschian els sco portavusch dals burgais svizzers en l'exteriur. Uschia Remo Gysin, il president da l'organisaziun che dumbra varga 700 uniuns svizras dapertut sin il mund.

Problems dettia numnadamain avunda

«Las bancas vesan ils clients da l’exteriur sco ristg. Tgi che vul avrir in conto sto pajar autas cumissiuns ni sto deponer, sco tar la Banca chantunala da Turitg, almain 100’000 francs. Quai decuraschescha blers Svizzers egl exteriur.»

Nus stuain augmentar nossa attractivitad e far pli enconuschent nossas purschidas.
Autur: Remo Gysin president OSE

In auter sectur nua ch'els cumbattian gia daditg per meglras cundiziuns è la participaziun da las Svizras e dals Svizzers en l'exteriur vid ils process politics en Svizra.

«La pli gronda part ha interess da sa participar a las votaziuns ed elecziuns en Svizra. Per pudair far quai ston els s’annunziar e retschaiver ad uras ils documents. Quai n’è betg il cas il mument. E-voting fiss qua in grond levgiament.»
Autur: Remo Gysin president OSE

Els sajan en stretg contact cun l'administraziun federala, ils chantuns e la politica ed emprovian d'influenzar las chaussas egl interess da lur commembers. E quella lavur porti era fritg, di Gysin. Sco exempel numna el la lescha nova che reglescha dapi dus onns la relaziun ed ils dretgs da las Svizras ed ils Svizzers egl exteriur ed era las incumbensas da l'OSE.

Mo metter ils mauns en crusch na vegni betg en dumonda. Remo Gysin vesa anc blers secturs nua che l'Organisaziun da las Svizras e dals Svizzers en l'exteriur stoppia s'engaschar.

«Il cussegl da las Svizras ed ils Svizzers en l'exteriur sto daventar pli democratics e nus essan en discussiuns cun ils chantuns per promover il e-voting sin nivel chantunal.»
Autur: Remo Gysin president OSE

Mo l’emprim vegni ussa fatg festa. 100 onns, in giubileum che duai dar schlantsch e motivaziun per era il futur defender ils interess da las Svizras e dils Svizzers egl exteriur.

Artitgels legids il pli savens