Las 13 persunas vegnan accusadas d’avair sustegnì u d'esser commember d’ina organisaziun criminala, d’avair cugliunà, fatg legalisaziuns falladas sco era d’avair lavà daners suspectus. Quai communitgescha la Procura publica federala la mesemna a Berna.
Daners svizzers per cumprar armas
Als accusads vegn renfatschà d’avair sustegnì finanzialmain la «probabla organisaziun da terrur» Tamil Tigers (LTTE) cun in sistem raffinà da credits pitschens – quai davent da la Svizra. Ils schefs da l’organisaziun en la Svizra hajan sviluppà e duvrà «ina metoda per vegnir svelt tar raps aifer las vischnancas tamilas da la diaspora en la Svizra». Ils daners hajan els tranter auter duvrà per finanziar la cumpra d’armas.
100’000 persunas mortas
La LTTE cumbatta dapi 37 onns per in stadi independent en il nordost da la Sri Lanka. Pervia dal conflict èn gia fin a 100’000 persunas mortas. Il matg 2009 è el ì a fin suenter che las truppas da la regenza han mazzà il schef da la LTTE Vellupillai Prhabakaran.