Siglir tar il cuntegn

Header

cuntegn

15% sin gudogns da multis Chombra pitschna di Gea a taglia minimala

Cun pauc entusiassem ha il Cussegl dals chantuns ditg Gea a la taglia minimala ch'è vegnida decretada da l'OECD. Las cundiziuns per concerns multinaziunals vegnan pli sumegliants tranter chantuns. Las entradas supplementaras possian ils chantuns salvar per gronda part.

Tscherts chantuns han fin qua purschì cundiziuns fitg favuraivlas a gronds concerns. Concerns multinationals sco Philip Morris a Vad u Glencore a Zug profiteschan. L'OECD ha dentant mez ina fin a talas cundiziuns per concerns cun svieuta sur 750 milliuns. Ella pretenda ina taglia minimala da 15% sin ils gudogns. Er la Svizra sa suttametta a quai.

Taglia minimala globala da l'OECD

Avrir la box Serrar la box

137 pajais èn da la partida tar la refurma: interpresas multinaziunalas cun ina svieuta sur 750 milliuns euros ston pajar ina taglia minimala da 15%. Sch'in pajais resta pli bass che quests 15% pon tschels pajais dumandar per dapli taglia da las interpresas.

La refurma è in project da l'OECD e la G20. L'OECD cumpiglia tut ils grond pajais dal Vest. La G20 che cumpiglia ils gronds pajais industrialisads.

Il Cussegl dals chantuns ha acceptà ina midada da la constituziun senza cuntravusch. Tscherts politichers sco Benedikt Würth (AdC/SG) fan nagin secret ord lur displaschair. El discurra dad in «exercizi obligatoric». Alex Kuprecht da la PPS di: «I va per che nagin substrat da taglia va a perder». Sch'ina tiara da l'OECD na dumanda numnadamain betg 15% taglia, lu pon auters pajais nua ch'il concern operescha simplamain pretender la differenza. Ergo, sche ellas na pajan betg en Svizra, pajan ellas en l'exteriur.

La pli gronda refurma da taglia dapi onns

Las cundiziuns per concerns multinaziunals èn pli sumegliants tranter chantuns. Dentant pensan blers chantuns gia sco mitigiar l'auzament da taglia, per exempel cun relaschar autras taglias. Las entradas supplementaras duain ir tar ils chantuns, ha il Cussegl dals chantuns decis. Ellas duessan vegnir partidas si tenor la clav per la gullivaziun da finanzas. Ils detagls vegnan segir a chaschunar inqual discussiun.

Suenter ch'il Cussegl naziunal ha tractà la lescha vegn la populaziun a votar sur da la midada da la constituziun, probablamain la stad 2023. La lescha duai entrar en vigur il 2024.

audio
RTR novitads da las 16:00
ord RTR Audio dals 28.09.2022.
laschar ir. Durada: 3 minutas 18 Secundas.

RTR novitads 16:00

Artitgels legids il pli savens