Uffizialmain communitgescha l'Uffizi federal da sanadad mintga di tranter 25'000 e 35'000 novas infecziuns. IL dumber zuppà saja dentant per il mument radund tschintg giadas pli aut, di Hauri en in'intervista cun la NZZ am Sonntag. L'activitad dal virus saja per il mument fitg auta. Il dumber da cas ed il dumber d'ospitalisaziuns vegnian probablamain a s'augmentar svelt. L'unda actuala vegnia probablamain a surpassar quella dal schaner. Plinavant vegnia l'obligatori da mascrinas schluccà anc accelerar quest trend.
La Confederaziun ed ils chantuns vegnan anc ina giada a sa fatschentar l'emna proxima en detagl cun il dumber da cas che s'augmenta.
Tenor Hauri duess la Confederaziun anc spetgar da schluccar l'obligatori da mascrinas en il traffic public almain fin la promavaira.
La protecziun entras las virolas u entras esser guarì saja anc adina buna. Ma er persunas vaccinadas trais giadas possian anc s'infectar e sa tschentar en l'ospital entras l'auta activitad dal virus. Ma ils ospitals na vegnian betg pli uschè svelt a la limita.
Sin la dumonda sche la populaziun prendia serius il virus, ha il medi chantunal respundì ch'il virus na saja betg svanì. El vegnia a restar ed a cumparair a moda stagiunala. Probabel saja ch'il virus vegnia anc ina giada a sa revoltar a moda ferma l'atun che vegn.
Bun temp stagiunal
Da stritgar l'obligatori da mascrinas en il traffic public l'entschatta avrigl, saja stagiunal in bun temp, crai Lukas Engelberger, il president da la Conferenza dals directurs e las directuras da sanadad chantunalas. Sche la situaziun vegnia puspè mendra e la situaziun en ils ospitals vegnia ils proxims dis puspè pli precara, stoppia la Confederaziun dentant anc spetgar cun la schluccada. En ospitals e chasas da tgira spetgia el che las mascrinas vegnian anc a restar, perquai ch'i dettia là bleras persunas vulnerablas, ed er il persunal stoppia sa proteger.
Il ristg da s'infectar a moda severa cun Covid-19 u da murir, saja grazia al'auta immunitad entant bler pli pitschen.
Ma, nus pudain er vinavant betg prender a la leva il virus.
Pli e pli fitg sajan puspè persunas pli passadas pertutgadas d'ospitalisaziuns pervi da corona. Per Engelberger èsi temp per ina vaccinaziun da rinfrestgament, uschè spert sco ina protecziun encunter in decurs grev vegn pli flaivel. Quai stoppian dentant las autoritads da lubientschas e la cumissiun per virolas examinar.