Il 2015 èn las prestaziuns socialas creschidas per 4,2% sin 162 milliardas francs, quai communitgescha l'uffizi federal per statistica. Quai è in quart dal product naziunal brut. En media è la summa da las prestaziuns socialas creschida ils onns avant adina per 3,3%. La raschun principala per l'augment sajan la vegliadetgna e la sanadad, ils dus puncts da custs ils pli auts.
Il 1990 muntavan las expensas anc a 72 milliardas francs, u a 15% dal product naziunal brut. Dapi il 2004 è la quota da las prestaziuns socialas tar tranter 22% enfin 24% dal product naziunal brut.
Dus terzs da las radund 206 milliardas entradas da la segirezza sociala vegnan finanziads entras contribuziuns d'assicuranzas socialas. Quella cumpart è gronda, cumpareglià cun l'UE (54%). En Svizra surpiglian ils assicurads e persunas protegidas 36%, ils patruns da lavur 30%. Il rest sa cumpona da contribuziuns dal stadi (24%) ed ulteriuras entradas (10%).
RR novitads 15:00