L'emna 39 ha l'Uffizi federal da sanadad BAG annunzià tut en tut 2'208 novas infecziuns cun il coronavirus. L'emna avant eran quai anc 2'907 novas infecziuns. Quai ch'è ina leva reducziun dals cas. Dapli il zercladur è la tendenza dentant ch'il dumber da novas infecziuns crescha mintg'emna. Quai resorta dal rapport da situaziun emnil ch'il BAG publitgescha mintgamai la gievgia.
Fatg bunamain 20% damain tests
Er durant l'ultima emna hai dà ils pli blers cas en trais chantuns: Vad, Genevra e Turitg han ensemen annunzià 59% da las novas infecziuns. Fin la gievgia èn vegnidas annunziadas al BAG 52 novas ospitalisaziuns en connex cun Covid-19 per l'emna passada. 36 persunas han duvrà la tgira intensiva en ospitals svizzers pervi da quella malsogna dal pulmun. Sco ch'igl ha num vinavant en il rapport èn vegnids annunziads fin uss 10 ulteriurs mortoris en connex cun il virus per l'emna 39.
L'emna passada vegnids fatgs 38'721 tests sin il coronavirus. L'emna 38 eran quai anc 85'088. Quai correspunda ad ina reducziun da 19,3%. La cumpart da tests positivs è sa reducì sin 3,7%, l'emna avant muntava la cumpart a 3,9%.
550 novs cas la gievgia
Per la Svizra ed il Principadi da Liechtenstein ha il BAG annunzià la gievgia 550 novas infecziuns. La mesemna aveva l'uffizi federal da sanadad anc annunzià 411 novas infecziuns. Plinavant hai dà in ulteriur mortori en connex cun il virus e 18 ulteriuras persunas han stuì vegnir ospitalisadas.
9 novas infecziuns en Grischun
Il chantun Grischun annunzia la gievgia 9 novas infecziuns cun il coronavirus. Ils ultims 7 dis hai uschia dà 25 novas infecziuns en Grischun. Actualmain sa chattan en l'entir chantun 30 persunas en isolaziun e 103 persunas en quarantina.
Alain Berset: «Fasa delicata»
Il minister da sanadad, Alain Berset, discurra il mument dad ina «fasa delicata». En in video ch'è vegnì publitgà la gievgia appellescha el a la populaziun da vinavant sa tegnair vi da las mesiras d'igiena.