Per l’emprima giada è l’entira summa da donaziuns creschida sin passa duas milliardas francs. Quai mussa il rapport da donaziuns che «Swissfundraising» e la fundaziun Zewo han publitgà. En media han las chasadas dà 350 francs per ina buna chaussa. La media è cunquai creschida per 50 francs. Insumma fatg ina donaziun han 8 da 10 chasadas.
En general han persunas pli veglias era dà dapli che giuvnas. Persunas sut 34 onns han en media dà radund 200 francs, quellas sur 55 onns, 500 francs. Pli auta che la paja è, e dapli che vegn dà. Tranter 35 e 44 onns è la prontadad da far ina donaziun in zichel pli pitschna, quai pervi da l'uschenunmada «fasa da famiglia giuvna».
Zewo è il post svizzer per certifitgar organisaziuns caritativas che rimnan daners. «Swissfundraising» è l'organisaziun professiunala da quels e quellas che rimnan daners en Svizra.