Per Stefan Engler, Cusseglier dals chantuns (PCD) è questa varianta l'unica valabla.
Las propostas alternativas en colliadas cun blers ristgs.
Cun avair dus tunnels che vegnan duvrads mintgin senza cuntertraffic, vegnia augmentada la segirezza en il tunnel, di Engler.
In nov tunnel porta dapli traffic, dapli traffic procura automaticamain per dapli malsegirezza, per dapli accidents.
La soluziun ch'ils adherents d'in segund tunnel al Gottard preschentan è daltuttafatg en il senn da l'iniziativa da las Alps. Il tunnel dal Gottard vegniss sanà senza in segund tunnel, il traffic vegnis svià surtut sin la rodaglia. Per realisar questa proposta stessan vegnir fabritgads stabiliments provisorics per chargiar ils vehiculs sin la viafier. Quest project custass be in terz dal fabricat d'in segund tunnel, nempe radund 1,5 milliardas francs.
Appels divergents ord il Tessin
«Cun questa soluziun na dessi be bler dapli traffic per las regiuns cunfinantas, sco per exempel sur il San Bernardino en il Grischun, il Tessin vegniss dentant isolà per radund trais onns dal rest da la Svizra», di Filipo Lombardi, Cusseglier dals chantuns tessinais. El appellescha ad ina solidaritad cun il chantun Tessin.
«Quai è be la mesa verdad» cuntradescha Mario Branda, il president da citad da Bellinzona e adversari d'in segund tunnel. «Per l’ina datti anc autras vias che mainan en il chantun Tessin e per l’autra ha il Tessin gia oz la pli nauscha aria en Svizra, pervi dal grond traffic», di Branda. Ils Tessinais hajan ditg perquai già duos giadas «na» ad in segund tunnel al Gottard, di Branda. El saja solidaric cun quella part da la populaziun che na less betg dapli traffic, mabain dapli qualitad da vita en il chantun.
Betg dispitaivel: in segund tunnel auza la capacitad
Da basa datti in augment da capacitad cun fabritgar in segund tunnel, quai fatg na negescha nagin. Perquai na dettia betg automaticamain dus tunnels cun dus vials da traffic, dian ils adherents d'in segund tunnel. Quai fiss be pussaivel suenter in'ulteriura votaziun dal pievel.
Quest argument saja da pauca valur, di Jon Pult. L'experienza mussia che sche la pussaivladad saja dada d'augmentar las capacitads, saja quai svelt fatg. I saja cugliunà da pretender il cuntrari.
In gea ad in segund tunnel al Gottard na saja betg in gea a dus tunnels cun mintgin dus vials, relativescha Stefan Engler. I dettia natiralmain qeusta pussaivladad per futuras generaziuns.
Cun in «na» a l'urna stuess il departament da Doris Leuthard ir anc ina giada sur ils cudeschs ed elavurar ina nova soluziun.
Decider davart il segund tunnel al Gottard, decida il pievel, ils 28 da favrer 2016.