A chaschun da l'emprima debatta da questa stad ha il Cussegl dals chantuns vulì francar la contribuziun da la Confederaziun al turissem svizzer anc tar 246 milliuns francs, 13 milliuns dapli che quai ch'il Cussegl federal e la Chombra gronda vulevan. Per circa medem bler ha la Chombra pitschna er vulì augmentar la contribuziun al fond per il svilup regiunal che fiss vegnì a 230 milliuns francs.
Suenter che quests augments n' han betg chattà ina maioritad l' emna passada en il Cussegl naziunal, ha il Cussegl dals chantuns laschà crudar quels oz ed è suandà la lingia dal Cussegl federal. Cun ils daners vul quel cuntanscher intginas finamiras ils proxims quatter onns: meglierar las cundiziuns per interpresas pitschnas e mesaunas, rinforzar las regiuns e l'attractivitad dal lieu da turissem e d'economia sco er promover la digitalisaziun.