Siglir tar il cuntegn

Svizra 22 blessads suenter cravals tranter Tircs e Curds a Berna

Dals acts da violenza tranter Tircs e Curds a Berna èn almain 22 persunas vegnidas blessadas, tranter auter era 5 policists. Intginas persunas sajan vegnidas arrestadas, communitgescha la polizia chantunala.

La polizia ha serrà la via suenter ch’igl ha dà cravals tranter Curds e Tircs naziunalists.
Legenda: La polizia ha serrà la via suenter ch’igl ha dà cravals tranter Curds e Tircs naziunalists. Keystone

Ils Curds hajan empruvà da disturbar ina demonstraziun da naziunalists tircs. Malgrà che la polizia haja empruvà da tegnair enavos els, hajan ils Tircs attatgà ils Curds en ina via laterala.

Plinavant haja dà blessads perquai ch'in auto saja charrà en ina gruppa da Curds. La saira sajan policists vegnids blessads durant in'ulteriura demonstraziun.

Procura publica investighescha

La procura publica investighescha en chaussa. La polizia aveva serrà parts dal center da Berna. Pliras ambulanzas èn stadas en acziun ed han stuì transportar ils blessads en l'ospital.