Il tschentar giu e natiralisar las ovras atomaras en Svizra vegn a custar in zic damain che spetgà. L'uniun dals gestiunaris Swissnuclear quinta en in studi da nov cun bun 23 milliardas francs. Quai èn passa ina milliarda damain che quai che l'uniun veva stimà avant 5 onns.
La raschun sajan tranter auter las experientschas ch'ins haja fatg cun tschentar giu l'ovra da Mühleberg. Las lavurs posteriuras e quellas da tschentar giu l'ovra hajan pudì vegnir fatgas parallel, uschia Swissnuclear. Ils gestiunaris dad ovras atomaras èn obligads da surpigliar ils custs per tschentar giu quellas e per deponer il rument radioactiv.
Trais quarts dals custs per tschentar giu e natiralisar las ovras atomaras sajan gia pajads u segirà en fonds da serrada e dismessa.
En in proxim pass vegn il studi examinà da l'Inspecturat federal per la segirezza nucleara e da la cumissiun administrativa dals fonds. Silsuenter vegn definà l'auteza da las contribuziuns dals gestiunaris en ils fonds.
Swissnuclear consista dals possessurs da las ovras atomaras svizras che produzeschan radund in terz da l'electrizitad en Svizra.