Siglir tar il cuntegn
Inhalt

Svizra 25% damain dumondas d'asil en ultims trais mais

En il segund quartal dal 2016 èn vegnidas fatgas en Svizra 5’962 dumondas d’asil. Quai è bun in quart damain che durant l’emprim quartal e 20% damain ch’en il segund quartal dal 2015. Las bleras persunas che fan ina dumonda d’asil vegnan da l’Eritrea, da la Somalia e da la Siria.

Legenda:
Persunas en process d'asil en chantun Grischun en cumparegliaziun cun il dumber per l'entira Svizra. Secretari statal per migraziun (stadi dals 30.06.2016)

Il segund quartal da quest onn han stgars 6’000 persunas fatg ina dumonda d'asil en Svizra. Quai èn bun 25% damain che l'emprim quartal da quest onn. Quai resulta da la statistica d'asil da la Confederaziun.

Prognosa n'è betg pussaivla

Il Secretari statal per migraziun ha reglà 2’728 dumondas d’asil en emprim’instanza durant il mais da zercladur. 585 persunas n’han survegnì nagin asil sin basa da la cunvegna da Dublin. 549 persunas han survegnì asil e 588 persunas èn vegnidas prendidas si provisoricamain.

Migrants al cunfin a Chiasso.
Legenda: Totalmain 67'321 persunas eran la fin da zercladur 2016 en il process d'asil en Svizra. Keystone

Il svilup en regiuns da conflict restia vinavant intschert. En consequenza saja quai er fitg grev da prevesair svilups da migraziun, scriva la Confederaziun. Uschia na possia quai dar nagina prognosa. Tant la Confederaziun sco er ils chantuns stoppian dentant far quint cun l’arrivada da pli blers migrants.

Retegnì 60 fugitivs a staziun da Bellinzona

La polizia tessinaisa ha tschiffà radund 60 fugitivs en in tren a Bellinzona. Sco quai che la guardia da cunfin ha communitgà saja quai il pli grond dumber da fugitivs che saja fin ussa vegnì registrà en in tren.

Las persunas sajan vegnidas transportadas enavos a Chiasso nua ch'ellas possian far ina dumonda d'asil. Na giajan ellas betg questa via vegnian ellas tramessas enavos en l'Italia.

Il tren era vegnì da Milaun. Tar ils fugitivs sa tractia quai per gronda part da persunas da l'Eritrea.

RR novitads 15:00