25 onns dapi «na» al EWR

Avant exact 25 onns ha il suveran svizzer ditg mo per pauc «na» a la participaziun da la Svizra al Spazi economic europeic (EWR). Cun sulettamain 50,3% ha il pievel mess ad acta il tema EWR per la Svizra.

La Svizra circumdada da l'Europa. Bild in Lightbox öffnen.

Legenda da maletgs: La Svizra è restada in zic ina insla entaifer l'Europa. Keystone

La participaziun a l'urna tar questa votaziun è stada in record: Bunamain 80 pertschient da las votantas e dals votants da la Svizra èn stads a votar. Quai è la pli auta quota dapi ch'i dat il dretg da votar per las dunnas.

Trumpada per ils ins, di da festa per ils auters

Per l'anteriur cusseglier federal per economia Jean-Pascal Delamuraz è il resultat stà ina terrada. El aveva schizunt discurrì d'ina «dumengia naira». Era ils schefs da las grondas interpresas svizras sco la Sulzer a Winterthur ni la Roche a Basilea eran sa mussads trumpads. Ellas avessan gugent profità da meglras cundiziuns entaifer la zona d'economia europeica.

Il grond victur da la votaziun è stà in auter grond interprendider: Christoph Blocher ch'era lura a la testa da la EMS-Chemie. Fermamain aveva el cumbattì cunter la participaziun da la Svizra al Spazi economic europeic (EWR).

RR actualitad 07:00