Siglir tar il cuntegn

Header

cuntegn

Svizra 3'700 decidan: Suveran svizzer di piz a cup gea a la LRTV

Il suveran svizzer di piz a cup gea a la nova lescha da radio e televisiun – quai cun in surpli da be 3’696 vuschs (50,08%). In cler gea (61,9%) hai dà per il conclus davart la diagnostica da preimplantaziun. Refusà cleramain han ils votants svizzers perencunter las duas iniziativas federalas.

Il suveran svizzer ha acceptà la nova lescha da radio e televisiun cun in surpli da 3’696 (50,08%). Cunquai ch’i è cun la nova lescha betg pli pussibel da mirar televisiun u tadlar radio nair, sa sbassan era las taxas per ils tegnairchasa dad oz radund 460 sin 400 francs il mais en l'avegnir. Las discussiuns davart il Service Public cuntinueschan entant.

Grafica davart LRTV
Legenda: RTR

Cler gea or da la Romandie

Il resultat pudess esser in dals pli stretgs resultats en l’istorgia da las votaziuns en Svizra . En tut han bun 1’128’400 votants ditg gea a la nova lescha e bun 1'124'700 han mess in na en l'urna. In cler gea ha quai cunzunt dà dals votants e da las votantas da la Romandie.

Grafica diagnostica
Legenda: RTR

Emprim pass è fatg

L’emprim pass per la diagnostica da preimplantaziun è fatg. Cun 61,9% da las vuschs ha il suveran svizzer ditg gea a la midada da la constituziun che pussibilitescha ch’ils medis dastgan examinar geneticamain ils embrios avant ch’implantar quels en la madra. Er il surpli dals chantuns ch’i dovra per midar la constituziun è vegnì cuntanschì.

«Inisieme» è trumpada

L'Uniun svizra da geniturs cun impediments spirtals «insieme» è trumpada da la decisiun. Sco quai che l'uniun scriva, vegn ella a sustegnair il referendum encunter la lescha medicinala per la reproducziun.

Il Cusseglier federal, Alain Berset, è perencunter cuntent cun il cler gea a la diagnostica da preimplantaziun. Il resultat mussia ch’ins possia era far ina discussiun publica davart temas extrem cumplex. «La maioritad vul ina diagnostica da preimplantaziun, dentant cun clers cunfins», uschia Berset.

Cler na a stipendis e taglia sin l'ierta

Tant l’iniziativa da stipendis sco era l’iniziativa da taglia sin l’ierta han fatg naufragi. Nagins dals chantuns han acceptà ina da las duas iniziativas. 72,5% han ditg na a l'iniziativa da taglia e 71% dals votants svizzers han refusà l’iniziativa da taglia sin l’ierta.

Grischun di gea a LRTV e diagnostica da preimplantaziun

Il suveran grischun ha ditg cun 53,9% da las vusch gea al conclus davart la diagnostica da preimplantaziun. In zic pli stretg è il gea a la lescha da radio e televisiun. Quella han ils Grischuns acceptà cun 50,9%. La participaziun è stada tar 40%.

Grafica da la LRTV
Legenda: RTR

Iniziativas senza schanza

In cler na hai persuenter dà tar las duas iniziativas federalas. L’iniziativa davart stipendis, cun la quala la Confederaziun e betg ils chantuns dueva esser cumpetenta per stipendis en il sectur da la furmaziun superiura, è persuenter vegnida cleramain refusada cun 77,2% na.

Era nagina schanza ha l’iniziativa davart la taglia sin l’ierta gì. Il suveran grischun ha refusà l’iniziativa cun la quala ils iniziants vulevan rinforzar la AVS e reparter pli gist il possess en la societad cleramain cun 76 % na da las vuschs.

Artitgels legids il pli savens