Las uniuns da tariffas e las societads da traffic grischunas annunzian pretschs pli auts. Bigliets ed abunaments vegnan 3,8% pli chars a partir dals 10 da december. Il BÜGA vegn en media 1,7% pli char sur tut las categorias.
Dal reminent annunzian las uniuns e societads da traffic grischunas pliras midadas:
- Da nov vala il BÜGA fin Sargans. Plinavant pon viagiantas e viagiants charrar tranter Castione-Arbedo e Bellinzona er cun il tren.
- L'uniun da tariffas Transreno vegn engrondida. Il sistem da zonas che vegn duvrà fin ussa a Cuira s'extenda da nov da Razén fin Landquart. Viadis da colliaziuns en las zonas èn da nov inclusas. Pia na pon ins pajar duas giadas la medema zona da traffic public pli.
- L'abunament Flexiabo, ch'i dat gia en Engiadin'Ota, è da nov en il sortiment per tut il Grischun, quai saja ina purschida optimala per persunas che lavuran en temp parzial.
- Tar Engadin Mobil na datti betg in augment da pretschs d'abunaments. Ils ulteriurs pretschs vegnian auzads levet.
- A Tavau e Claustra datti er in augment da pretschs. Il sortiment vegnia plinavant midà dal tuttafatg. Ils detagls davart il midament vegnian annunziads ad in'autra occasiun.
En l'entira Svizra creschan ils pretschs il 2024 per 4,3% en media. Quai è dapi il 2016 l'emprim augment da pretschs en il traffic public.