Siglir tar il cuntegn

Header

video
Amherd e Keller-Sutter – ed il Grischun
Or da Telesguard dals 05.12.2018.
laschar ir. Durada: 1 minuta 36 Secundas.
cuntegn

Svizra 3 dunnas e 4 umens – il nov Cussegl federal

L'Assamblea federala ha elegì las duas novas en l'emprim scrutini: La cussegliera naziunala Viola Amherd (PCD/VS) è vegnida elegida cun 148 vuschs, la cussegliera dals chantuns Karin Keller-Sutter (PLD/SG) cun 154 vuschs.

Per l'emprima giada en sia istorgia ha il parlament svizzer elegì il medem di duas dunnas en il pli aut gremi svizzer, en il Cussegl federal. Uschia vegn furmada la regenza svizra nov da las trais dunnas Simonetta Sommaruga, Viola Amherd e Karin Keller-Sutter e dals umens Alain Berset, Ueli Maurer, Guy Parmelin ed Ignazio Cassis.

video
L'elecziun da las duas cusseglieras federalas novas
Or da Telesguard dals 05.12.2018.
laschar ir. Durada: 1 minuta 53 Secundas.

Viola Amherd: portasperanza da las muntognas

La cursa tranter las duas candidatas da la partida cristandemocrata per la successiun da Doris Leuthard n'è betg stada stretga. La Vallesana Viola Amherd ha persvadì dapli parlamentarias e parlamentaris en Chasa federala, uschia ch'ella succeda a Doris Leuthard.

Jau sper fitg che Viola Amherd vegnia da purtar en ils interess da las regiuns da muntogna.
Autur: Martin Candinas cusseglier naziunal (PCD/GR)

La giurista ed advocata vallesana

Dapi il 2005 politisescha la giurista ed advocata Viola Amherd en il Cussegl naziunal. Plinavant è ella vicepresidenta da la fracziun cristiandemocrata en la Chasa federala.

Cun in pe è la Vallesana adina stada en la politica. Uschia è la dunna da 56 onns stada en il cussegl da la citad da Brig-Glis. Experientscha en l'executiva ha Viola Amherd rimnà sco anteriura vicepresidenta e suenter 12 onns sco presidenta da la citad da Brig.

Karin Keller-Sutter: la vusch da la Svizra Orientala

Dapi il cumenzament dal cumbat electoral per la successiun da Johann Schneider-Ammann valeva Karin Keller-Sutter sco clera favurita dals liberaldemocrats. La candidatura da ses concurrent Hans Wicki è adina puspè vegnida titulada sco candidatura dad alibi.

Sia rolla da favurita ha Keller-Sutter confirmà tar l'elecziun. 154 dals parlamentaris e da las parlamentarias han dà la vusch a Keller-Sutter.

Karin Keller-Sutter è ina fitg buna tscherna per il chantun Grischun e la Svizra orientala.
Autur: Stefan Engler cusseglier dals chantuns

La translatura ch'è politicra cun corp ed olma

La Songagliaisa da 54 onns ch'ha emprendì translatura è dapi il 2011 en il Cussegl dals chantuns. En quest temp ha ella savì bajegiar si ina buna rait en la Chasa federala. Karin Keller-Sutter ha dentant er experientscha en la politica chantunala. Ella è stada parlamentaria e cussegliera guvernativa dal chantun Son Gagl.

Gia avant otg onns aveva Karin Keller-Sutter gì ambiziuns da daventar cussegliera federala. Johann Schneider-Ammann aveva da lezzas uras dentant fatg la cursa.

audio
Mezdi: Analisa da las elecziuns cun correspundent RTR A. Camartin
ord Actualitad dals 05.12.2018. Maletg: RTR
laschar ir. Durada: 3 minutas 10 Secundas.

RR novitads 09:00++

Artitgels legids il pli savens