Siglir tar il cuntegn
Inhalt

Svizra 3 milliardas pervia da quints memia auts

Cun ina moziun vul cusseglier naziunal Heinz Brand (PPS/GR) cumbatter quints sistematicamain memia auts da medis ed ospitals.

In medi scriva vid il computer.
Legenda: Diesch pertschient da tut ils quints a las cassas da malsauns èn memia auts, quai mussa in studi da Santé Suisse. Keystone

La cifra è immensa. Passa 100 milliuns quints survegnan las cassas da malsauns mintg'onn. Quints per prestaziuns da medis, terapeuts ed ospitals. Il problem saja che mintga 10avel quint saja memia auts.

Quai mussia in studi, crititgescha il cusseglier naziunal da la pps e president da Santé Suisse, Heinz Brand. Savens sajan quai sbagls per negligientscha. Mo i dettia era auter, raquinta el:

Intgins medis tschentian pli savens che auters quint per il studi da las actas dal pazient ni ch’els tschentan quint per prestaziuns ch’els n’han betg fatg, nua ch’il pazient di ch’el na saja betg stà tar il medi.
Autur: Heinz Brandcusseglier naziunal (PPS/GR)

Custs supplementars da 3 milliardas francs

Quai che para ina piculezza per il singul resulta la fin finala dentant ella summa considerabla da trais milliardas francs. «Quai èn diesch pertschient prestaziuns per ils quals ins ha tschentà quint senza necessitad. E qua pon ins spargnar senza far mal ad insatgi.»

Per cuntanscher quai dovria dentant squitsch. Squitsch tar quels che tschentian ils quints. Brand propona perquai al Cussegl federal da midar la lescha da las cassas da malsauns uschia ch'ins po chastiar quels che tramettan sistematicamain quints memia auts: Tar quels duajan vegnir tratgs giu diesch pertschient da la summa da quint e quai durant sis mais.

Medis na vesan nagin basegn d'agir

Ina proposta che na plascha insumma betg als medis. Urs Stoffel da la Federaziun dals medis svizzers FMH:

Primo dubitain nus quellas cifras e nus essan da l'avis ch’i dat avunda mesiras per pudair sancziunar talas nursas nairas sch’ellas existan.
Autur: Urs StoffelFederaziun dals medis svizzers FMH

Els hajan cifras da Santé Suisse che mussian che l’onn 2016 sajan mo 98 commembers stai confruntai cun ina procedura perquai ch'els hajan mess quints sbagliads. Tar passa 37'000 commembers sajan quai piculezzas.

Digitalisaziun duai gidar

Mo quai saja insatge tut auter, cas giuridics, respunda Heinz Brand. Ad el giaja en emprima lingia per megliurar la qualitad generala dals quints. Tar las apotecas per exempel funcziuneschia quai gia oz meglier. Lezzas hajan dentant er modernisà e digitalisà ina gronda part da lur process:

Gist tar ils ospitals ed ils medis pon ins pretender il medem. Numnadamain ch’els fan vinavant cun la digitalisaziun e ch’i dat il futur pli paucs sbagls tar la tschentada da quints.
Autur: Heinz Brandcusseglier naziunal (PPS/GR)

La fin finala profiteschian lura tuts da quai. Las cassas da malsauns possian reducir uschia ils custs da controlla e pajar pli spert ils quints da medis ed ospitals. Ed ils pazients profiteschian da custs da sanadad pli bass.

RR actualitads 07:20