Cun l'iniziativa da Fair food, per lung «l'iniziativa per mangiativas/victualias producidas a moda sauna ed ecologica», pretendan ils Verds standards ecologics e socials per products d'import. Els vulan segirar ch'i po vegnir vendì en Svizra be products cun in standard minimal da qualitad, ecologics, da protecziun d'animals e cundiziuns da lavur.
La Confederaziun duai fermar las pretensiuns e garantir che products agriculs che vegnan importads adempleschian questas pretensiuns. Vitiers pudess el auzar ils dazis d'import. Per products agriculs elavurads pli ferm sco era per pavel stuess la Confederaziun aspirar finamiras. Plinavant duai vegnir reducì il sfarlattim da victualias.
Dapli purs
L'iniziativa per la suveranitad alimentara è vegnida lantschada dal sindicat dals purs, Uniterre. Ella pretenda che la producziun da mangiativas indigena vegn rinforzada. La Confederaziun duai instradar mesiras per auzar il dumber da puras e purs e da mantegnair la surfatscha cultivada.
Per products agriculs da l'exteriur duai la Confederaziun auzar ils dazis e regular la massa che po vegnir importada. Products agriculs che na correspundan betg a lal normas svizras socialas u ecologicas duain pudair vegnir scumandadas. In scumond vul Uniterre era per organissems ch'èn vegnids midads geneticamain.
Cussegl federal e parlament din Na
Il Cussegl federal ed il parlament refusan questas duas iniziativas. Davart in'iniziativa agricula ha il pievel decidì l'ultima giada il settember passà. Là ha il pievel svizzer approvà l'iniziativa davart la «segirezza alimentara». Quella è vegnida elavurada pervi dal squitsch da l'Uniun purila. L'artitgel incumbensescha la Confederaziun da stgaffir premissas per garantir il provediment da victualias en Svizra.
Dapli vias da velo
Il conclus federal davart las vias da velo è ina cuntraproposta directa da l'iniziativa da velos, lantschada da Pro Velo, l'uniun tetgala per ils interess dals velocipedists. Sch'il pievel ed ils chantuns din Gea a l'iniziativa, vegn l'artitgel da la Constituziun davart vias da peduns e vias da viagiar schlargià cun la noziun da «vias da velos».
Ils iniziants avevan retratg lur iniziativa a favur da la cuntraproposta dal parlament. La cuntraproposta cuntegnia la pretensiun la pli impurtanta da l'iniziativa, numnadamain che vias da velos vegnan mess sin il medem stgalim sco vias da peduns e da viagiar. Cun quai vegnia mess la basa per ina rait da vias da velos tras l'entira Svizra.
L'iniziativa avess sfurzà la Confederaziun da promover vias da peduns, da viagiar e da velos e da metter a disposiziun meds finanzials. L'artitgel ch'è uss en discussiun lubescha a la Confederaziun da sustegnair mesiras da promoziun. El stgaffescha dentant naginas novas subvenziuns.
RR novitads 11:00