Plinavant vegnian adina dapli persunas franadas pervi da dimora illegala. Las guardias da cunfin sa lamentian entant dad ina situaziun da persunal precara. I manchian fin 300 collavuraturs, uschia il schef dal corp da guardias da cunfin Jürg Noth envers la «Schweiz am Sonntag». Uschia na possian els betg pli ademplir tut lur incumbensas.
Il sistem da Dublin ha fatg naufragi.
En vista a la crisa pretenda l'anteriur schef da l'uffizi federal per migraziun Alard du Bois-Reymond da reponderar la politica d'asil. Il sistem da Dublin tenor il qual ils fugitivs ston vegnir registrads e restar en il pajais nua ch'els arrivan haja fatg naufragi, uschia du Bois-Reymond envers il «SonntagsBlick».
Ins emprovia da far la differenza tranter persequitads e fugitivs economics. En vista a la situaziun da guerra en Siria e l'Eritrea saja ina tala procedura però ina illusiun. Ins stoppia proteger tut ils fugitivs dals dus pajais.
RR novitads 06:00