Siglir tar il cuntegn
cuntegn

Svizra 300 milliuns francs per la malgiustia suffrida

Las unfrendas da las «mesiras repressivas preventivas» e dal «plazzament ester» duain vegnir indemnisadas cun fin a 300 milliuns francs. Quai propona il Cussegl federal. Las contribuziuns da solidaritad vegnan en l’emprima lingia finanziads da la confederaziun.

Cun questa summa duessi esser pussibel da pajar a mintga persunas pertutgada 20’000 fin 25’000 francs.
Legenda: Cun questa summa duessi esser pussibel da pajar a mintga persunas pertutgada 20’000 fin 25’000 francs. Keystone

Ils chantuns possian bain sa participar voluntarmain a l’indemnisaziun. Il Cussegl federal spetga dentant ina «contribuziun adequata» en l’autezza dad in terz da la summa totala. Er autras instanzas sco per exempel la baselgia, l’uniun purila u l’industria da farma pudessan contribuir insatge a quella summa da maximalmain 300 milliuns francs.

300 empè da 500 milliuns francs

Quai propona il Cussegl federal en sia cuntraproposta indirecta a l'iniziativa da reparaziun. El ha tramess quella cuntraproposta oz en consultaziun. Auter ch’il Cussegl federal pretenda l’iniziativa 500 milliuns francs indemnisaziun e betg mo 300 milliuns.

Renconuschientscha da la malgiustia

Cun questa summa duessi esser pussibel da pajar a mintga persunas pertutgada 20’000 fin 25’000 francs. Il Cussegl federal fa quint cun 12’000 fin 15’000 unfrendas. La lescha regla tgi ch’ha insumma il dretg da survegnir ina contribuziun da solidaritad, l’autezza da la summa duai dentant adina restar la medema. La lescha saja in segn da renconuschientscha per la malgiustia suffrida, statti scrit en il sboz.

RR novitads 15:00