La 30avla ediziun da la Street Parade ha carmalà radund 920'000 visitadras e visitaders a Turitg. Quai stima il comité d’organisaziun. Per l’emprima giada insumma è er in commember dal Cussegl federal stà da la partida, numnadamain il president da la Confederaziun, Alain Berset. Envers SRF ha el suttastritgà quant impurtanta che questa occurrenza saja per la Svizra e ch’i sa tractia da la pli gronda occurrenza culturala dal pajais.
615 tractaments medicinals
Las forzas da salvament «Schutz und Rettung Zürich» han tenor atgnas indicaziuns stuì tractar radund 615 persunas medicinalmain. Quai saja circa medem bleras sco l'onn passà. I saja stà pervi da blessuras, in culp da chalira, ma era pervi da memia bler alcohol e drogas. En pli sajan sis persunas grevblessadas vegnidas transportadas en l’ospital.
Bilantscha da la Polizia da la citad
Tenor la Polizia da la citad è la Street Parade stada per gronda part paschaivla. Las forzas d'intervenziun hajan arrestà en tut 41 persunas. Tranter auter pervia d'enguladitschs, blessuras corporalas, smanatscha u il commerzi cun drogas.
