La Cumissiun federala per dumondas da famiglia pretenda dapli temp per mammas e babs suenter ina naschientscha. Fin a 38 emnas congedi per geniturs, pia 22 emnas dapli ch'ozendi duai dar en l'avegnir tenor la cumissiun. Questa proposta n’è betg nova e sa basa sin il resguard da l’egualitad d’um e dunna.
Il model ch'è vegnì preschentà il mardi a Berna propona dapli congedi per ils babs. Almain 15 da las 38 emnas duajan els retrair. Sch'ils babs na fan betg quai, scroda il dretg sin questas emnas da congedi. La mamma na po betg surpigliar quellas.
Ristga da depressiuns tar mammas sa reducescha
Il congedi dals geniturs sustegnia il svilup e la sanadad dals uffants, fa la cumissiun valair per sia pretensiun. Per las mammas sa reduceschia cun il temp dals geniturs la ristga da depressiuns e da situaziuns psichicas da chargia, ed ella rinforzia la relaziun cun il bab da l’uffant.
Avantatgs vesa la Cumissiun federala per dumondas da famiglia er per l’economia, sch’il temp dals geniturs na cuzzia betg memia ditg. Ella augmentia la productivitad sco er l’activitad da gudogn da las dunnas. Las dunnas pudessan uschia er meglierar lur rentas. E dunnas bain scoladas sa decidessan grazia al temp dals geniturs pli fitg per e betg cunter uffants.
