Siglir tar il cuntegn

Header

cuntegn

4% damain Barry Callebaut ha vendì damain tschigulatta

La glieud mangia sco i para damain tschigulatta durant la pandemia. Il concern da tschigulatta Barry Callebaut ha en scadin cas vendì damain tschigulatta dal settember enfin il november da l'onn passà.

L'emprim quartal da l'onn da fatschenta 2020/21 ha il producent da Turitg vendì 560'000 tonnas tschigulatta. Sco Barry Callebaut scriva, correspunda quai ad in minus da 4% cumpareglià cun la medema perioda l'onn precedent. Er la svieuta è sa reducida per 11% sin 1,8 milliardas francs. Analisas avevan quintà cun in minus da sulettamain 3%.

Malgrà il minus en l'emprim quartal è Barry Callebaut optimistic da cuntanscher las finamiras a media vista. Ils proxims trais onns vul il producider da tschigulatta vender mintg'onn 5 fin 7% dapli tschigulatta.

Ord l'archiv

En l'archiv da RTR sa chatta in film che fa in purtret da la fabrica da tschigulatta «Chocolat Grison». Quella han Carl Georg Bernhard e Charles Müller-Hähl fundà l'onn 1893. Pli tard ha Lindt & Sprüngli cumprà la fabrica, l'onn 1993 è quella vegnida serrada definitivamain. Il film mussa l'istorgia dal cacau e la producziun da tschigulatta en la fabrica «Chocolat Grison».

video
Fabrica da tschigulatta “Chocolat Grison” (Industrias Grischunas, 24-11-1968 4/4)
Or da L’archivar recumonda dals 24.11.1968.
laschar ir. Durada: 6 minutas 30 Secundas.

RTR novitads 09:00

Artitgels legids il pli savens