En Svizra èn mortas 227 persunas en accidents da traffic l’onn 2020. Quai èn 40 dapli che l’onn avant. Las pli bleras persunas èn mortas en autos. 71 tenor la statistica d’accidents da l’Uffizi federal da vias Astra. Quai èn 6 dapli che l’onn avant. I ha era dà in zichel dapli grev blessads. L'onn 2020 eran quai 3'797, l'onn avant eran quai 3'639.
Pervia da corona han blers prendì il velo
Tar las motociclistas e motociclists è il dumber dals morts creschì da 30 sin 52. Tar accidents da velo e dad e-bike èn mortas 44 persunas. Quai èn 17 dapli ch’il 2019. Quai che croda en egl è l'augment dal mortoris dals motociclists da 6 sin 14 en la vegliadetga da pensiun. 21 da quels ch'èn sa disgraziads mortalmain han chaschunà sez l'accident. Pervi da la pandemia da corona hajan blers prendì dapli il velo, uschia l’Astra. Quai haja influenzà ils accidents.
Damain accidents tar peduns
Tar pedunas e peduns percunter hai dà damain accidents. 36 persunas èn sa disgraziadas mortalmain e bunamain la mesadad èn sa disgraziads sin ina strivla melna. Grev sa blessà èn 408 persunas suenter 524 l'onn avant.
Ord l'archiv
Dals 31'000 accidents capitads l'onn 2019 en Svizra, en passa 80% dals cas capitads per atgna culpa. L'Uffizi Federal per statistica e la SUVA, l'Institut d'assicuranza d'accidents svizra, han publitgà las cifras dals accidents da velo da l'onn 2019.
