Siglir tar il cuntegn

Header

cuntegn

Svizra 40 grevs accidents ad onn pervia d’insects

En Svizra procuran insects mintg'onn per radund 40 grevs accidents. Quai communitgescha l'assicuranza d'accidents Suva. Pervi da vespras, avieuls e zeccas datti mintg'onn bun 20’000 accidents.

Ils pli pitschens animals sajan quels, che blessan il pli savens il carstgaun, communitgescha la Suva. Pervi da vespras, avieuls e zeccas dettia quai numnadamain mintg'onn bun 20’000 accidents. La mesadad da quels sajan d'attribuir a las zeccas.

Stagiun auta han quellas il zercladur. Durant quest mais vegnan en media passa 1200 persunas morsas d'ina zecca. Vespras chaschunan 3’000 accidents l'onn ed ils avieuls radund 2’300. Ils avieuls èn ils pli activs l'entschatta avust, las vespras mez avust.

40 grevs accidents ad onn

La gronda part dals accidents chaschunads d’insects n'èn betg privlus, quietescha la Suva. Privlus vegn quai pir sch’insatgi è allergics sin il tissi dals insects, sch’el vegn piztgà en la bucca u sch’ins sa lascha distrair da l’insect. Lura po quai dar in accident d’auto u ch’ins croda giu da la stgala.

Grevs accidents cun insects nua ch’ils pertutgads na possian per passa 3 mais betg pli lavurar, dettia tuttavia 40 giadas ad onn en Svizra, uschia la SUVA.

RR novitads 18:00

Artitgels legids il pli savens