La posta svizra ha fatg l’onn passà in gudogn da 254 milliuns francs. Cumpareglià cun il 2022 saja quai in minus da 41 milliuns francs. Quai ha communitgà il concern davant las medias a Berna. D’attribuir saja quest resultat surtut a la luna da consum deprimida en consequenza da la chareschia. Uschia saja per exempel il dumber da brevs sa reducì per bunamain 6 pertschient sin 1,6 milliardas. Tuttina saja il resultat stà en il rom da las spetgas.
Tramess pli paucas brevs e pachets
En la sparta da logostica è il gudogn sa reducì per 23 milliuns francs sin 335 milliuns francs. Malgrà la diminuiziun da la quantitad da pachets tramess quintian ins qua cun ina creschientscha a lunga vista. Uschia tramettia la clientella da la posta oz ca 70% dapli pachets ch'anc avant 10 onns. Las quantitads da las brevs èn sa reducidas sin 1,647 milliardas, quai è ina reducziun da 5,6% cumpareglià cun l'onn precedent.
Midada dals tschains cun in effect positiv
La Postfinance sco segund grond segment ha l’onn passà sentì positivamain l’influenza da la midada dals tschains ed ha cuntanschì in resultat da gestiun pli aut. La societad affiliada da la posta ha fatg in gudogn da 264 milliuns francs, bun 15% pli aut che l'onn avant. En total dumbrava la PostFinance la fin da settember 2,47 milliuns clients.
Pajaments al spurtgel èn cun ina reducziun da 18% ids enavos marcantamain, quai munta ad ina perdita da 93 milliuns francs.
