413 vischnancas en muntogna pateschan

L'iniziativa da segundas abitaziuns haja chaschunà gronds donns economics en las regiuns pertutgadas. A questa bilantscha intermediara vegn ina dieta da la Gruppa Svizra per las regiuns da muntogna SAB venderdi a Berna.

In placat encunter l'iniziant. Bild in Lightbox öffnen.

Legenda da maletgs: In placat atgisa Franz Weber - in impressari d'immobiglias a Crans sa vilenta publicamain encunter l’iniziant da l’iniziativa dad abitaziuns secunda... Keystone

En sia communicaziun da la dieta fa la SAB ina bilantscha fitg stgira da la situaziun economica en las regiuns muntagnardas suenter il gea a l’iniziativa dad abitaziuns secundaras. La conclusiun è clera:

«  L’iniziativa da segundas abitaziuns ha causà en las regiuns muntagnardas donns considerabels a l’economia publica. »

SAB
Gruppa Svizra per regiuns da muntogna

En sia communicaziun resumescha la SAB ils puncts ch'èn critics tenor ella:

  • Il livel da pretsch è sa reducì en muntogna - Zermatt (- 11%), San Murezzan (-13%) Saanen (-15%) – ed è malgrà ch’el è creschì en media svizra (+6%). Pertutgadas èn tut las vischnancas cun dapli che 20% abitaziuns secundaras.
  • A perder van taglias da vendita d’immobiglias, taglias sin interpresas e taglias da persunas natiralas. Quai mussa tenor la SAB ch’i sajan idas a perder plazzas e che famiglias indigenas hajan stuì bandunar lur patria. Da l’autra vart datti conflicts cun ils proprietaris dad abitaziuns secundaras sche las vischnancas emprovan da vegnir cun impostas sin abitaziuns secundaras tar novas entradas.
  • Ella n’haja betg profità da l’iniziativa, mabain «il cuntrari». Las pernottaziuns èn sa reducidas massivamain: Tessin -8%, Grischun -8,7% e Valais -3,8%. La SAB conceda bain, che l’iniziativa da segundas abitaziuns saja ina da differentas raschuns per la crisa. Ils hotels en la regiun alpina perdian valur. Andreas Züllig, il president da Hotelleriesuisse, discurra dad ina «expropriaziun fraida». Da fabritgar in hotel nov na saja praticamain betg pli pussaivel senza sponsoring extern.

Malgrà questa situaziun prova la SAB da na laschar pender las alas e constatescha sforzs positivs ch'èn vegnids fatgs suenter la votaziun:

  • La Confederaziun ha reagì cun in program d’impuls turistic per ils onns 2016-19. En diversas regiun vegni lavurà vi da novas vias – uschia per exempel cun l’iniziativa «Warmesbett.ch» en Surselva. Punct positiv saja che la substanza architectonica da bajetgs protegids entaifer la zona da construcziun sappia vegnir nizzegiada. Là attestescha la dieta al Grischun dad esser il pli enavant da tut ils chantuns pertutgads.

Tut quai na possia tenor la SAB dentant betg cumpensar las perditas.

RR novitads 15:00