La Chombra gronda ha augmentà il credit per las vias naziunalas da 4,6 sin 5,7 milliardas francs. La raschun per quai augment èn ils sviaments da La Chaux-de-Fonds e da Näfels che la chombra gronda ha integrà el program.
Plinavant vul la maioritad burgaisa realisar trais projects supplementars tar ils plans dal Cussegl federal. In tunnel el chantun Basilea Campagna, ina via el chantun Turgovia e la finiziun da l’autostrada tranter Uster e Hinwil. Projects che n’èn atgnamain anc betg planisai a fin e nua ch’ils custs n’èn perquai era betg dal tut enconuschents. Per betg bloccar tut tschels projects ha la Chombra gronda decidì ch’il Cussegl federal sto pli tard anc preschentar in credit d’impegn.
Smanatscha da referendum
La cussegliera federala Simonetta Sommaruga ha avertì che quels projects sajan vegnids tschernids a moda arbitrara e betg democratica. Sin pauc plaschair fruntan ils plans per engrondir las capacitads da las vias tar ils Verds e tar l’Associaziun traffic ed ambient (VCS). Sch’il Cussegl dals chantuns na curregi betg ils excess pondereschian els da prender il referendum.
RR novitads 11:00