Passa 5'900 dunnas ed umens candideschan l'atun per il Cussegl naziunal. Cumpareglià cun las elecziuns avant quatter onns è quai in plus da passa 1'200 persunas. In dumber da record da candidaturas han annunzià plirs chantuns, tranter auter il Grischun, Turitg e Berna. Pli paucas candidaturas dettia dentant en Basilea-Citad, Friburg ed il Valais. Quai rapporta l’agentura da novitads Keystone-SDA. Las elecziuns federalas èn ils 22 d'october.
Puspè pli aut ch'il 2019 è er il dumber da las glistas inoltradas fin ussa. En ils 20 chantuns cun elecziuns da proporz èn vegnidas inoltradas fin glindesdi saira 618 glistas. Il 2019 eran quai 511 ed il 2015 422.
Dus cussegliers dals chantuns gia elegids
Ils 46 sezs per il cussegl dals chantuns han en mira var 170 persunas, quai mussan cifras da l'agentura da novitad Keystone-SDA. Per dus cussegliers èsi gia cler avant las elecziun ch'els vegnian ad esser en il nov «Stöckli»: Daniel Fässler (AdC/AI) è vegnì confermà en uffizi la primavaira dal cumin. Erich Ettlin (AdC/OW) è vegnì elegì senza scrutini, nagins cuntracandidats eran s'annunziads.
