Tranter 50 fin 60 raps custa ins mascra da protecziun. Per in pac da 50 mascras munta quai in pretsch da 35 francs. Per famiglias e persunas che vivan al minimum d'existenza pon gist quests daners esser decisivs. Avant 11 onns durant la grippa da portgs custava ina mascra da protecziun be 10 raps al toc. Tenor ils grossists Migros e Coop ha il ferm augment da pretsch per l'ina da far cun la gronda dumonda, la concurrenza ed ils stops temporars d'exports da la China.
Caritas Grischun porscha sustegn
Per quels che na pon betg finanziar ina mascra porscha la Caritas Grischun mascras da protecziun gratuitas. Da quella purschida fan gia radund 150 persunas per di diever. Per il mument ha la Caritas Grischun a disposiziun 1'000 mascras. Dapli mascras èn gia sin via. Quellas duessan lura tanscher per ils proxims 2 enfin 3 mais.